JANO LATIL DE SISTEROUN

Dins lis annalo de Sisteroun e li memòri de Jan-Audouard de Laplane (1774 -1870) se pòu legi uno dramatico e sanguinouso istòri qu’a viscu nosto vilo. Uno fremo, Jano Latil, n’es la tristo erouïno.
Sian lou 14 de juliet de 1617 : fai forço caud souto lou bèu cèu blu e tambèn dins lis esperit. Fau dire que la regènci de Marìo de Medicis, maire dóu futur rèi Louïs XIII, es uno gouvernanço qu’escracho lou pichot pople emé forço redevènço, tasso, impost de touto meno.
La pèsto de 1580 es encaro dins li memòri ; la misèro pico pertout sènso óublida li pendesoun, lou plot e áutri…  que soun quàsi quoutidian e lou mai souvent injuste.
En mai d’acò, Sisteroun, vilo de 8000 estajan, a degu paga 20 000 escut pèr lou rachat de la Bourgado de La Baumo.
E vaqui uno nouvello tasso,  »la Foraine », que dèu greva li marchandiso vouiajant d’uno prouvinço à l’autro. Es la tasso de trop !…
Dounc, à n’aquèu jour dóu 14 de juliet, à la fin dóu tantost, se fai crido de l’arribado d’uno troupeto menado pèr dous coumessàri, Francés d’Alby, Segne  de Brez, e Jan-Pèiro Baumont, vengu pèr enqueissa aquélo tasso.
L’escarrado passo lou pont de la Baumo e, au pourtau Sant Jaume rescountro l’eissame di  »culs  verts » : li dóu Bourg Reinaud, li de La Costo, aumenta de tóuti li pichots artisan emé la pauriho, arma soulamen de fourco, bastoun. Es uno troupelado tempestouso, menaçanto ; se devino que la castagno vai peta !
Lou courtege es talamen butassa que lou gouvernour militàri, Jaume d’Espagno, restant emé si 210 sourdat au Fort de Sisteroun, mando sa troupo pèr acoumpagna e apara li noutable fin-qu’à l’oustalarié de la Tèsto d’Or a-dre de la font redouno, tengu pèr Segne Bricot.
Mai li plus encagna di manifestant fourçon li pesànti porto de l’oustalarié e arribon à desbousca Segne de Brez. Tirassa fin-qu’à la font redouno, rousta qu’es- pas- de- dire, lou mal-astru vèi tout-à-n’un cop uno bello bruno, bugadiero de soun mestié mai dispausado tambèn pèr faire d’àutri mestié, se clina sus éu. Es Jano Latil, l’avès devina.
Subran, nosto bello aganto lou presounié e, emé soun voulame que tèn d’uno man seguro, ié coupo lou sèisse !
Lou malurous mor dins d’ourribli soufrènço.
Li jour seguènt, li represaio de la Justiço, despachado en grando coucho pèr lou Parlamen d’Aïs, soun terrible : uno trenteno de menaire o supausa tau soun arresta.
Lou  proucès, lèu acaba, se tremudo en ban de sang e de lagremo emé forço eisecucioun (pendesoun, pilot, suplice de la rodo) lou 15 d’avoust, plaço de la Catedralo.
La vilo devra paga uno emendo de 50 000 liéuro e aura de punimen eisemplàri. Faudra touto l’enfluènci e la diploumacìo de l’Evesque Mounsegne de Glandevès pèr supremi o atenua la sentènci.
Pèr quant à nosto bruno, l’istòri aura memòri de soun subre-noum : Jano  »la descuiaro »  o  »la descouaro ». (traducioun segur inutilo!)

(Traduction dans le Sisteron Journal 3819 – 21/03/2020)